ԵՐՐՈՐԴ «ՀԱՐԹԱԿԸ» ԳՅՈՒՄՐԻՈՒՄ
«Հարթակ»-ը փորձի փոխանակման փառատոն է, որն արդեն երրորդ անգամ է կազմակերպվում Հայաստանում: Փառատոնի նպատակն է ստեղծել մի հարթակ, որտեղ մասնակիցները սովորելու, փորձելու, անձնական փորձը ներկայացնելու և ինքնաբացահայտման հնարավորություն կունենան վարպետության դասերի, գործնական սեմինարների միջոցով: Փառատոնը մի հարթակ է, որը նպաստում է ստեղծագործական տարբեր միջավայրերում կապեր ստեղծելուն, դրանք ամրապնդելուն և շփման հնարավորություն ընձեռելուն:
Երկօրյա փառատոնն անցկացվեց մի քանի բաժիններով քաղաքի տարբեր հատվածներում: Փորձի փոխանակման երկօրյա ծրագիրը բաղկացած է չորս հիմնական բաժիններից՝ տեխնոլոգիա, արա ինքդ, արվեստ, հոգի և մարմին:
Երրորդ «Հարթակ» փառատոնի գլխավոր թեմատիկ շեշտադրումը Գյումրու քաղաքային լանդշաֆտն է: Գյումրիում կարելի է գտնել ժամանակագրական տարբեր շրջանների շինություններ, նոր ու ավեր կառույցներ, որոնք հարուստ նյութ են ստեղծագործողների համար: Ճարտարապետական այս առանձնահատկությունները քննարկվել են Գյումրու տեխնոլոգիական կենտրոնում, որին զուգահեռ «Լոֆտ Գյումրիում» բազմաբնույթ վարպետության դասեր են անցկացվել, իսկ Ռիժկովի ճեմափողոցում ինքնատիպ ձեռագործ աշխատանքների, արծաթագործության, համեղ արևելյան աղանդերի ցուցահանդես-վաճառք էր:
Գյումրիում էր նաև սիրահայ Շանթ Խայալյանը, ով արդեն 4 տարի է Երևանում է ապրում. «Ես պատրաստում և վաճառում եմ օճառներ: Գյումրի եկել եմ օճառ պատրաստելու վարպետության դաս անցկացնելու համար:
Գյումրին կարծես Հայաստանից առանձին մի երկիր է. ունի իրա ռադիոն, հեռուստատեսությունը, բացի դրանից այն եղել է արվեստի կենտրոն: Ինձ դուր է գալիս գյումրեցիների արվեստը, և «Հարթակ» փառատոնը հնարավորություն ընձեռեց նորից լինել Գյումրիում ու շփվել գյումրեցիների հետ, խոսել, կիսվել ու սովորել իրարից»,- ասում է Շանթն ու ներկայացնում իր պատրաստած օճառի որոշ գաղտնիքներ:
Իսկ հարևան տաղավարներում ու վարպետության դասերին ոչ միայն օճառագործության, նաև խեցեգործության, նկարչության, թաղիքագործության, ձեռագործ աշխատանքների պատրաստման փորձով էին կիսվում:
Իր գործունեության երկու տարիների ընթացքում փառատոնը մի գունեղ հարթակի շուրջ է համախմբել ամենատարբեր ստեղծագործ, նորարար և փորձառու մարդկանց` գրանցելով զգալի նվաճումներ՝ շուրջ 2,500 մասնակից և 130 վարպետության դաս:
Անահիտ Հարությունյան
Անահիտ Հարությունյան
- Created on .
- Hits: 2862