Իմ ժամանակը հոսում է դեպի քեզ,

քո մեջ անհետանում:

Իմ ունեցվածքը հենց այն է, ինչ դու

վերցնում ես ինձանից:

Եվ ես վերջ չունեմ:

Եվ չունեմ սկիզբ

քո ափերի մեջ:

քանզի հավիտյան քեզ եմ տվել

արքայությունը,՝

և զորությունը,

և փառքը

պատասխանատվությունից

խուսափելու համար

ամեն

Առաջին անգամ նա ժպտաց մարտի 1-ին,

ըստ պատմաբանների, զորամասում սեղմել էին նրա ձեռքը,

հետո խփել ուսին՝ հիմա կամ երբեք,

նախկին դասղեկը պատմում է՝ աչքերում

խավար կար, նստույմ էր աղջիկներից հեռու...

Պապս գրկել է ինձ

ու զգացել ծանրությունը շաղգամի,

ու մինչ մենք դրսում

բանակցում էինք սև արագիլի հետ,

տարիներ են անցել խրճիթում քարե,

ու քարը դանդաղ փայտ է դարձել,

որ կայրվի մի օր պատահական հրդեհից:

Ես այնքա˜ն եմ հոգնել պատերազմից`

տղամարդկանց ու տղամարդկանց,

կանանց ու կանանց,

կնոջ ու տղամարդու միջև:

Եվ հիմա

երազում եմ ուղղակի ծառ լինել`

կանաչ բլուրին աճող:

Իջեցնել ջերմաչափը

հրեշտակի թևի տակից`

ուղիղ կիտրոնի մեջ:

Ի´նքդ մաշվել

վերին ճնշման սանդղակն

ի վար`

դեղնակարմիր երախտիքի…