Ճարտարապետների գեղանկարչական աշխատանքների ցուցահանդես
Սույն թվականի նոյեմբերի 15-ին ճարտարապետության ազգային թանգարան-ինստիտուտում տեղի ունեցավ «Ճարտարապետների գեղանկարչական աշխատանքների» աշնանային ցուցահանդեսի բացումը:
Ցուցահանդեսի բացմանը ելույթ ունեցան ՀՀ Քաղաքաշինության փոխնախար Ռուզան Ալավերդյանը, ՃԱԹԻ-ի տնօրեն Աշոտ Գրիգորյանը և ցուցահանդեսի հանձնակատար Անի Հայկազունը:
ՀՀ Անկախության շրջանում առաջին անգամը լինելով՝ Հայաստանի ճարտարապետության ազգային թանգարան-ինստիտուտը կազմակերպում է ճարտարապետների գեղանկարչական աշխատանքների խմբակային ցուցահանդես:
Ինքնին հետաքրքիր է իմանալ, թե ճարտարապետները իրենց հիմնական նախագծային գործունեությանը զուգահեռ արվեստի այլ տեսակներով զբաղվում են արդյոք և ինչպես:
Հայտնի է, որ 20-րդ դարի, հատկապես առաջին կեսի հայ ճարտարապետները (Թամանյան, Բունիաթյան և այլք) շատ լավ տիրապետել են գծանկարի և ջրաներկի տեխնիկային՝ մեզ թողնելով տասնյակ գեղեցիկ ստեղծագործություններ: Նրանցից ետ չեն մնացել նաև 20-րդ դարի վերջի հայ ճարտարապետները (Ռաֆաել Իսրայելյան, Բաղդասար Արզումնայան, Արթուր Թարխանյան, Գրիգոր Աղաբաբյանը և այլք): Նրանց գծանկարչական և գունանկարչական ստեղծագործություններում իրենց արտացոլումն են գտել հատկապես հայ միջնադարյան ևժամանակակից ճարտարապետական կոթողները, ինչպես նաև աշխարհի շատ երկրներում շրջագայության ընթացքում արված ճեպանկարները:
Իրենց ստեղծագործական ներկապնակի բազմազանությամբ տարբերվում են ժամանակակից հայ ճարտարապետները: Նրանց ստեղծագործություներում այժմ նկատելի են ժանրային տարատեսակ դրսևորումներով (բնանկար, դիմանկար, նատյուրմորտ, կոմպոզիցիոն աշխատանքներ, շարժեր), զանազան նկարչական հնարքների եւ նյութերի կիրառումով (կոլաժ, համակարգչային գրաֆիկա և այլն) արված աշխատանքներում (Ն. Հակոբյան, Հ. Չալիկյան, Ս. Պողոսյան, Ա. Սեդրակյան, Ռ. Օհանյան, Աշ. Գրիգորյան, Հ. Ասատրյան, Վ. Թամազյան և այլք):
Գեղանկարչական աշխատանքների շարքը համալրվել է քանդակով, գոբելենով, դեկորատիվ-կիրառական արվեստի այլ գործերով: Ճարտարապետներից շատերը զբաղվում են նաև ինտերյերի, էքստերյերի դիզայնով և այլն:
Ուրախալի է, որ մեր հրավերին արձագանքնեցին ԱՄՆ-ի և Ռուսաստանի հայ ճարտարապետները, ինչպես նաև ԵրՃՇՊ-ի ուսանող-ճարտարապետները: Ցուցահանդեսին իրնեց ստեղծագործություններով մասնակցում են Գյումրիի, Վանաձորի, Գորիսի, Դսեղի, Երևանի ճարտարապետներ:
Ցուցահանդեսում ներկայացված են ավելի քան 40 հեղինակաների գեղանկարչական, գրաֆիկական, դեկորատիվ կիրառական արվեստի աշխատանքներ: Մեկ ուրախալի փաստ այս ցուցահանդեսը լայն արձագանքներ ունեցավ մեր ճարտարապետների կողմից, որի համար մեր շնորհակալությունն ենք հայտնում նրանց:
Նախաձեռնելով այս աշնանային ցուցադրությունը՝ հույս ենք փայփայում, որ այն կդառնա ավանդական և հայ ճարտարապետները մեզ կուրախացնեն ոչ միայն իրենց ճարտարապետական նախագծերով ու կոթողներով, այլ նաև իրենց գեղանկարչական և գծանկարչական ստեղծագործություններով:
Ցուցահանդեսը բաց կլինի մինչև ս/թ Դեկտեմբերի 3-ը: Մուտքն ազատ է:
Նյութը պատրաստեց ցուցահանդեսի հանձնակատար,
արվեստաբան Անի Հայկազունը,
Լուսանկարները` հեղինակի
- Created on .
- Hits: 2854