Ե՞ՐԲ ԵՍ ՎԵՐՋԻՆ ԱՆԳԱՄ ԳԻՐՔ ԿԱՐԴԱՑԵԼ․ ԳՐՔԻ ԳԻՇԵՐ-2017
Մաշտոցի 20 հասցեում գտնվող «Բուկինիստ» գրախանութի դիմաց` գրատախտակին, գրված է․ «Ե՞րբ ես վերջին անգամ գիրք կարդացել»: Գիրք կարդալ շատերն էին ուզում. սիրելի ստեղծագործությունը գնելու համար պետք է քո տեղը գտնեիր անընդհատ ավելացող հերթի մեջ:
«Գրքի գիշեր-2017»-ն այս տարի իր պատվավոր տեղն է գտել «Էրեբունի-Երևան-2799» միջոցառումների ցանկում: Միսաք Մանուշյանի անվան պուրակում միջոցառումները սկսվել են ժամը 18:00-ից ու շարունակվել մինչև կեսգիշեր: Կեսգիշերից հետո գրքատոնը տեղափոխվել է առցանց հարթակ, որտեղ «Բուկինիստ» գրախանութի ամբողջ տեսականին շարունակվել է վաճառվել 30% զեղչով:
«Նախաձեռնությունը ծնվել է անցյալ տարի և ունեցել շատ մեծ հաջողություն։ Այս տարի որոշեցինք ավելի լայն ձևաչափով անել, կարծում եմ՝ մարդիկ շատ գոհ կլինեն այս միջոցառումներից: Սա շարունակական բնույթ կկրի ու կդառնա լավ ավանդույթ»,- ասել է «Բուկինիստ» գրախանութի տնօրեն Խաչիկ Վարդանյանը:
Օդի սառնությունը կարելի էր կոտրել մեկ բաժակ տաք թեյով ու շարունակել հետևել միջոցառումներին: «Թեյախմություն ենք կազմակերպել, թեյելու ենք հրավիրում երևանցիներին, դարչինով թեյ ու բլիթներ հյուրասիրում»․ Զաքարյան Քրիստինե:
Տաղավարներից մեկը նման էր հեքիաթային աշխարհի: «Գրքի գիշեր-2017»-ի թեման «Ալիսան հրաշքների աշխարում» հեքիաթն է: Փորձել ենք ստեղծել գեղեցիկ ու վառ մթնոլորտ երեխաների համար»,- պատմել է Աշոտ Գաբրիելյանը։ Երեխաներն իրար հերթ չտալով լուսանկարվում էին չար թագուհու և Ալիսայի հետ:
Հնարավորություն էր ստեղծվել ծանոթանալու, խոսելու ու ինքնագիր վերցնելու սիրելի հեղինակներից: Այստեղ էին Հրաչյա Մանուկյանը, Գուրգեն Խանջյանը, Հրաչյա Ամիրյանը, Յուրա Սարգսյանը, Հովիկ Չարխչյանը:
Շատ էին նաև ինտերակտիվ խաղերի տաղավարները: Դրանցից մեկն էլ Գրքամոլ ակումբի կազմակերպած խաղն է։ «Այս տաղավարում Գրքամոլ ակումբն իր անդամների հետ միասին անցկացնում է վիկտորինա, որտեղ միջոցառմանը եկած մարդիկ, պատասխանելով գրականության, գրողների վերաբերյալ հարցերին, հավաքում են միավորներ և ստանում նվեր` գիրք», ասել է Գրքամոլ ակումբի հիմնադիր Համլետ Մուրադյանը:
Մեկ այլ տաղավարում խաղում են «Այլ կերպ», «Բառախաղ»: Մի փոքր այն կողմ գրքերը փաթեթավորված են ու մեկ նախադասությամբ հուշում։ Հինգ գիրք գուշակողը ստանում է զեղչի քարտ:
Բազմաբնույթ միջոցառումների շարքում են նաև տիկնիկային ներկայացումը, Հայաստանի Աստվածաշնչային ընկերության տաղավարը, որտեղ, բացի գրքերից, հեռուստատեսային տարբերակով ներկայացվում են նաև երեխաների ընթերցմամբ Աստվածաշնչյան հատվածներ:
Միջոցառումների շարքն ամբողջացնում էր կենդանի երաժշտությունը՝ Ռուբեն Քամալյանի, Քրիստ Մանարյանի, Վահան Արծրունու և ուրիշների մատուցմամբ:
Մերի Հովհաննիսյան
- Created on .
- Hits: 4235