«ԴՈՎԼԱԹՈՎ» ՖԻԼՄԸ ՎԱՐՁՈՒՅԹՈՒՄ ԿԼԻՆԻ 2017-Ի ՎԵՐՋԻՆ
Ռուս ռեժիսոր Ալեքսեյ Գերման-կրտսերի «Դովլաթով» գեղարվեստական ֆիլմը վարձույթում կլինի 2017 թվականի վերջին: Ռուսական լրատվամիջոցների հաղորդմամբ այդ մասին հայտարարել է «Լենֆիլմ» կինոստուդիայի գլխավոր տնօրեն Էդուարդ Պիչուգինը հունիսի 5-ին տեղի ունեցած «Հեղափոխություն և գրականություն» կլոր սեղանի ընթացքում:
««Լենֆիլմն» ավարտել է «Դովլաթով» ֆիլմի նկարահանումը: Ժապավենը թողարկելու ենք տարվա վերջին»,-հայտնել է նա:
Ֆիլմը նկարահանված է կենսագրական մելոդրամա ժանրում, գործողությունները տեղի են ունենում 1971 թվականին: Այն հայտնի գրողի կյանքի լենինգրադյան չորս օրերի մասին է: Ռեժիսորը վերստեղծել է այդ ժամանակաշրջանին բնորոշ միջավայր՝ Լենինգրադի աշխարհիկ կյանքը 1970-ականներին, «Սայիգոն» սրճարանը, Դրամատիկական մեծ թատրոնի ծաղկուն շրջանը, «Լենֆիլմ» կինոստուդիան:
«Դովլաթով» ֆիլմում տեղ են գտել գլխավոր հերոսի և երիտասարդ բանաստեղծ Իոսիֆ Բրոդսկու խոսակցությունների տեսարանները: Կինոֆիլմը բարձրացնում է ռուսական և եվրոպական մշակույթի համար հավերժական՝ բարոյական ընտրության հարցը:
Դովլաթովի դերում նկարահանվել է սերբ դերասան 34-ամյա Միլան Մարիչը, ֆիլմում խաղում են նաև Ելենա Լյադովան, Դանիլա Կոզլովսկին, Անտոն Շագինը, Սվետլանա Խոդչենկովան և ուրիշներ:
- Created on .
- Hits: 2699