ՄԱՐԻԱՄ ԵՎ ԵՐԱՆՈՒՀԻ ԱՍԼԱՄԱԶՅԱՆՆԵՐԻ ՊԱՏԿԵՐԱՍՐԱՀԸ ՀԱՍԱՆԵԼԻ Է ՕՆԼԱՅՆ ՀԱՐԹԱԿՈՒՄ
Թանգարանների միջազգային օրը Մարիամ և Երանուհի Ասլամազյան քույրերի պատկերասրահը գործարկեց պաշտոնական կայքէջը՝ aslamazyanmuseum.com-ը:
Կայքը պատմում է պատկերասրահի ստեղծման, Ասլամազյան քույրերի կյանքի ու ստեղծագործական գործունեության մասին: Օնլայն տիրույթում տեղ են գտնելու նաև անցկացվող միջոցառումների ու ցուցահանդեսների մասին տեղեկություններ. «Կայքն ամբողջ պատկերասրահի մասին տեղեկություն է պարունակում, և բացի դրանից, նկարիչ քույրերի բոլոր գործերը թվայնացվել են. 21-րդ դարում փորձում ենք ավելի հանրայնացնել Ասլամազյանների մշակույթը»,- կայքէջի շնորհանդեսի ժամանակ նշեց պատկերասրահի տնօրեն Վահագն Ղուկասյանը:
Կայքը եռալեզու է՝ հայերն, ռուսերեն և անգլերեն, ինչն ավելի կընդլայնի կայքի այցելուների շրջանակը և մեծ հնարավորություն կտա ծանոթանալու պատկերասրահի, ինչպես նաև Ասլամազյան քույրերի աշխատանքներին: «Կայքի ստեղծման աշխատանքները բավականին երկար տևեցին, սակայն արեցինք այնպես, որ այցելուի ու պատկերասրահի միջև կապն ավելի ամրանա ու փոխշփումն ավելի հետաքրքիր դառնա»,- հավելեց Վահագն Ղուկասյանը:
Կայքի շնորհանդեսին ներկա էր նաև Գյումրու փոխքաղաքապետ Ռուբեն Սանոյանը, ով իր խոսքում շեշտեց. «Այս նորաստեղծ կայքի միջոցով մենք կարող ենք աշխարհին ներկայացնել մեր մշակութային ժառանգությունը»:
Թանգարանների միջազգային օրը պատկերասրահում արդեն փաստերի լեզվով ներկայացվեցին բոլոր ձեռքբերումները: Տարբեր ծրագրերի ու ցուցադրությունների շնորհիվ ավելացել է այցելուների թիվը, իսկ որոշ ծրագրերի աջակցությամբ կարողացել են վերականգնել ֆոնդերում պահված ցուցանմուշները, բացի այդ ձմռանը պատկերասրահում հատուկ համակարգերի միջոցով ապահովվում է հատուկ ջերմաստիճան, որպեսզի Ասլամազյան քույրերի նկարները չվնասվեն ջերմաստիճանի տատանումներից:
Անահիտ Հարությունյան
Անահիտ Հարությունյան
- Created on .
- Hits: 2972