«ՌԵԱՆԻՄԱՆԻԱՆ» ՀԱՅՏԱՐԱՐԵՑ ՄՐՑՈՒՅԹԻ ՀԱՂԹՈՂՆԵՐԻՆ

ReAnimania-scholarship
   Դեկտեմբերի 10-ին Հայաստանում Ֆրանսիայի դեսպանատանը տեղի ունեցավ Հայաստանում Ֆրանսիայի դեսպանության և «ՌեԱնիմանիա» անիմացիոն կինոյի և պատկերապատման արվեստի միջազգային փառատոնի համատեղ մամլո ասուլիսը: Ֆրանսիայի դեսպանության մշակութային հարցերով կցորդ տիկին Նատալիա Ցագրիսը բարձր գնահատեց «ՌեԱնիմանիայի» և Հայաստանում Ֆրանսիայի դեսպանության միջև սերտ համագործակցությունը ֆրանսիական անիմացիոն կինոյին աջակցության և խթանման, ինչպես նաև անիմացիոն կինոյի ոլորտում հայ ու ֆրանսիացի արտադրողների միջև գործընկերության զարգացման համար:
    «ՌեԱնիմանիա» փառատոնի հիմնադիր տնօրեն, պրն Վրեժ Քասունին իր հերթին փաստեց երկու գործընկերների կողմից նոր տեսակի համագործակցության ստանձնումը վերապատրաստման և կրթության բնագավառում: Առաջին անգամ Ֆրանսիայի դեսպանությունը կրթաթոշակ կտրամադրի երկու հայազգի երիտասարդի վերապատրաստման համար, ովքեր 2016 թվականին կմեկնեն Անգուլեմի Անիմացիոն կինոյի դպրոց:
    Կրթաթոշակի համար մրցույթը հայտարարվել էր դեռևս այս տարվա հոկտեմբերի 9-ին, և ընտրությունը կատարել էր Անգուլեմի Անիմացիոն կինոյի դպրոցը: Հայտ ներկայացրած երիտասարդ անիմատորներից կրթաթոշակը շնորհվեց Լևոն Բաղդասարյանին և Շուշանիկ Եսայանին: Լևոն Բաղդասարյանն արժանացավ առաջին կրթաթոշակին, որը հնարավորություն է տալիս 2016թ. հունվարին մեկ ամսով վերապատրաստման դասընթացի մեկնել Անգուլեմի անիմացիոն դպրոց։ Դասընթացի շրջանակում կուսուցանվի ավանդական 2D անիմացիա, CG 2D, 3D, stop motion, cut animation և այլ անիմացիոն հմտություններ։ Իսկ Շուշանիկ Եսայանը վերապատրաստման դասընթացի կմեկնի երկրորդ կրթաթոշակով 2016թ. գարնանը՝ 1,5 ամսով։ Դասընթացի շրջանակում կուսուցանվի ավանդական 2D անիմացիա։