«Գրականությունն ինձ համար սովորելու, ապրելու տեղ է եղել»

anna-davtyan
    Այսօր «Հայ գիրք» գրախանութում տեղի ունեցավ հերթական գրական հանդիպումը: Հյուրը բանաստեղծ Աննա Դավթյանն էր: Բացի ստեղծագործելը՝ նա զբաղվում է լուսանկարչությամբ, ժամանակակից գրականության թարգմանությամբ: 2012-ին լույս է տեսել Աննա Դավթյանի բանաստեղծությունների առաջին ժողովածուն՝ «Գիրք Շնորհակալության»-ը: «Գրելիս շնորհի զգացողություն ունեի, այն ամենը, ինչի մասին գրել եմ, ինձ համար սովորելու, ապրելու տեղ է եղել, տեղ, որի գոյությունը հասցրել է շնորհակալության»,- ասում է հեղինակն ու ավելացնում, որ իր շնորհակալությունը ավելի լայն է պետք հասկանալ, քանի որ այն մանրի ու մեծի փոխհարաբերության մասին է: 
    Գրախանութում հավաքվել էին Աննա Դավթյանի գրչակից ընկերները, երիտասարդ ստեղծագործողներ և ընթերցողներ: «Աննա Դավթյանի պոեզիան լավ իմաստով համասեռ է, ներդաշնակ, քանի որ այնտեղ ոչ թե առարկան է, այլ առարկայի զգացողությունը, ոչ թե միտքը, այլ մտքի զգացողությունը»,- նշեց գրող Վահրամ Մարտիրոսյանը: 
    Հանդիպման ընթացքում Աննա ընթերցեց իր բանաստեղծությունները, ներկաներն էլ հնարավորություն ունեցան ստանալու իրենց հուզող հարցերի պատասխանները: 
    Ստորև ներկայացնում ենք Աննա Դավթյանի բանաստեղծություններից:
                                                                                                                               Աննա Կարապետյան
                                                                                                       
Լուսանկարները՝ Աննա Կարապետյանի
                                 ***
                                 Այն, ինչ ընկած է գիշերից
                                 մինչև առավոտ –
                                 նախշերը շարժումները, խարխափումը,
                                 վախը, այլությունը,
                                 և այն, ինչ ցերեկվա մեջ է –
                                 միշտ եղածը, չկրկնվողը,
                                 ցանկությունը՝ դեպի գիշերը գնացող,
                                 փախուստը, մնալը, նայելը,
                                 և այն, ինչ բացարձակ սահմանին է,
                                 և այն, որ տեղավորվելու հատկություն չունի, շարժվում է,
                                 և այն, որ կանգնած է, բայց չկա, և այն, որ կա ինչ-որ տեղ,
                                 ԲՈԼՈՐԸ
                                 իմ մեջ են:
                                                                Աննա Դավթյան