BUSYMPHONY․ ԵՐԲ ԱՎՏՈԲՈՒՍՈՒՄ ՀՆՉՈՒՄ Է ԿԵՆԴԱՆԻ ԴԱՍԱԿԱՆ ԵՐԱԺՇՏՈՒԹՅՈՒՆ

busymphony
Սեպտեմբերի 26-ին՝ Կոմիտասի ծննդյան օրը կոմիտասյան մի շարք ստեղծագործություններ և այլ կոմպոզիտորների գործեր հնչեցին ոչ թե համերգային դահլիճում կամ հրապարակում, այլ ավտոբուսում։

Ներքաղաքային ավտոբուսներից երկուսում կենդանի կատարմամբ հնչեցին Մոցարտի, Պուչինիի, Պիացոլլայի ստեղծագործություններից։ Ներկայացնում էր նորաստեղծ Հայ-ամերիկյան կամերային միացյալ նվագախմբի անդամներից կազմված քառյակը։

BuSymphony ֆլեշմոբի միջոցով նվագախումբը հայտնում է իր գոյության մասին, միաժամանակ երաժշտասերներին նախապատրաստում նոյեմբերին կայանալիք իրենց առաջին համերգին։

Հայ-ամերիկյան կամերային միացյալ նվագախումբը (“United American and Armenian Chamber Orchestra”) ստեղծվել է Աշոտ Տիգրանյան մշակութային-երաժշտական հիմնադրամի կողմից ջութակահար Աշոտ Տիգրանյանի նախաձեռնությամբ։ Հիմնադրամի նախագծերի ղեկավար Անահիտ Պետրոսյանի փոխանցմամբ՝ հայաստանցի մասնակիցներին հուլիս-օգոստոս ամիսներին մրցութային կարգով ընտրել է պրոֆեսիոնալ ժյուրին, ամերիկյան կողմից ներգրավված են հիմնականում Տիգրանյանի ղեկավարած Դասական համերգային կամերային նվագախմբի (“Classical Concert Chamber Orchestra”) անդամները, որոնք տարբեր ազգերի ներկայացուցիչներ են։
2 busypmphony
Առաջիկա համերգի փորձերը կսկսվեն հոկտեմբեր ամսին, երբ ԱՄՆ-ից Հայաստան ժամանեն ամերիկյան կողմը ներկայացնող երաժիշտները։ Թե ինչ համերգային ծրագիր է սպասվում, Աշոտ Տիգրանյան մշակութային-երաժշտական հիմնադրամի նախագծերի ղեկավարը չցանկացավ նշել։

«Միայն կասեմ, որ բավականին հետաքրքիր ծրագիր է լինելու։ Այն բացառիկ նվագախմբերից է, որը դիրիժոր չունի։ Դիրիժորը ջութակով է նվագելու, այդպես է ղեկավարելու նվագախումբը»,- Cultural.am-ի հետ զրույցում ասաց Անահիտ Պետրոսյանը։

Սեպտեմբերի 27-ին և 28-ին նույնպես մայրաքաղաքի հանրային տրանսպորտի՝  նախապես ընտրված 4 գծերում կանցկացվի BuSymphony ֆլեշմոբը։ 
3 busymphony
Աշոտ Տիգրանյան մշակութային-երաժշտական հիմնադրամը ստեղծվել է այս տարի։ Նպատակն է Հայաստանում և Հայաստանից դուրս ստեղծել մշակութային այլընտրանքային հարթակ, որը հնարավորություն կտա հայ և օտարազգի արվեստագետներին միավորվել մեկ ընդհանուր գաղափարի շուրջ, նախաձեռնել և իրականացնել ծրագրեր, նախագծեր, որոնք կնպաստեն մշակույթի զարգացմանը, դասական երաժշտության, կինոյի և թատրոնի, գրականության և կերպարվեստի ոլորտներում տեղի ունեցող դրական փոփոխություններին։

Հիմնադիրը ջութակահար Աշոտ Տիգրանյանն է, որը 30 տարի շարունակ երաժշտական գործունեություն է ծավալել ԱՄՆ-ում և Եվրոպայում՝ հիմնադրելով և ղեկավարելով ամերիկյան “Classical Concert Chamber Orchestra”-ն («Դասական համերգային կամերային նվագախումբ»)։ Վերջինս տասը տարի անընդմեջ շրջագայություններով հանդես է եկել Իտալիայում, Իսպանիայում, Ֆրանսիայում, Սկանդինավյան երկրներում և այլուր։ 

Աննա Կարապետյան