Այս տարի «Արձակ 2013»-ը ոչ թե հեղինակի, այլ հենց պատմվածքի մրցույթ էր

ardzak2013
    Այսօր տեղի ունեցավ «Անտարես» հրատարակչության և «Գրանիշ» գրական ակումբի կազմակերպած «ԱՐՁԱԿ 2013» պատմվածքի մրցույթի մրցանակաբաշխությունը:
    «Արձակ 2013» մրցույթին մասնակցել էր  102 պատմվածք, որից ընտրվել էր լավագույն 21-ը: Այս տարի առաջին մրցանակ չկար: Փոխարենը երեք լավագույն մրցանակի արժանացան (100-հազարական դրամ պարգեւավճարով) 3 պատմվածք` Նարինե Կռոյանի «Ցեցի դեղը», Արփի Ոսկանյանի «Ողջերին թող թաղեն ողջերը» և  Համբարձում Համբարձումյանի «Համլետի հոր ուրվականը» պատմվածքները: Եվս երկու պատմվածք՝ Անրի Գրիգորյանի «Սիեստա»-ն  և Մերրի Մկրտչյանի «Շպերունգ»-ը, լավագույնների շարքում էին, և նույնպես մրցանակների արժանացան: 
    «Անտարես» հրատարակչության գլխավոր խմբագիր, գրականագետ Արքմենիկ Նիկողոսյանի խոսքով մրցույթի կարևոր թիրախը նոր անունների բացահայտումն է, իսկ մյուս կարևոր նպատակը՝ հայ գրականության նմուշների թարգմանությունը  և դրանք դրսի հրատարակչություններին ներկայացնելը:
    «Որպես կանոն` յուրաքանչյուր մրցույթի արդյունքում հայտնաբերում ենք նոր անուններ: Այս մրցույթին մասնակցել է 102 պատմվածք, որոնցից եզրափակիչ հասած 21-ն այսօր արժանացան մրցանակների»,- ասաց գրաքննադատը՝ ավելացնելով, որ «Արձակը» շարունակական բնույթ է կրելու, քանի որ այս մրցույթը կարողանում է մարդկանց ինտերնետից պոկել և ստիպում գիրք կարդալ, անգամ ստիպում է գրիչը վերցնել և գիրք գրել»:
    Իսկ «Անտարես» հրատարակչության տնօրեն Արմեն Մարտիրոսյանը իր հերթին նկատեց, որ այսպիսի մրցույթներ անցկացնելը խթանում է հանրության մեջ պոեզիայի նկատմամբ հետաքրքրության  մեծացմանը: «Ինչ վերաբերում է այս մրցույթին, ապա անուններ բացահայտելուց հետո սկսում ենք տվյալ հեղինակների հետ սերտ համագործակցել: Մենք փնտրում ենք նոր գրողներ և նոր գործընկերներ, որոնց ժողովածուները կկարողանանք տպագրել»:
    Հիշեցնենք, որ սա « Անտարես» հրատարակչության և «Գրանիշ» գրական ակումբի արդեն երրորդ նախաձեռնությունն էր, որն այս տարի մի փոքր փոփոխությունների էր ենթարկվել: Այս անգամ մրցույթին ներկայացված պատմվածքները կայքում հայտնվել էին միայն վերնագրով և առանց  հեղինակների անունների: Ինչն էլ նպաստել էր ժյուրիի կազմին անցկացնել ոչ թե հեղինակի, այլ հենց պատմվածքի մրցույթ: Այս տարվա ժյուրիի կազմում էին Դավիթ Գյուրջինյանը, Զավեն Բոյաջյանը, Նարինե Վարդանյանը, գրականագետներ՝ Գոհար Աքելյանը, Հայկ Համբարձումյանը, Հասմիկ Հակոբյանը և մանկագիր Նունե Թորոսյանը:
Օվսաննա Սիմոնյան